Ros

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.

Ros
Coordinata di color
Hex	#FFC0CB
RGB*	(r, g, b)	(255, 192, 203)
CMYK	(c, m, y, k)	(0%, 25%, 20%, 0%)
HSV	(t, v, i)	(349°, 25%, 100%)
* standarisa na [0–255] (byte)

Ros ta un nomber di color pa describi tanto un tint di color cora como color biña. Ros ta traha door di mescla cora of biña hunto cu blanco cual ta resulta den un color cora of biña cla. Ariba e circulo di color moderno ros ta cai meymey di cora y lila (un biña cla).^[1]

Etimologia[editá | editá fuente]

Den occidente, ros tabata considera como un tint of color refina di cora.^[2] Sinembargo cu hende humano den cada cultura ta biologicamente adapta pa mira algo ros (manera flor), asina mes hopi idioma, incluyendo Latin y Griego antiguo, no tin un palabra pa 'ros'.^[3] Linguisticamente, ros ta un di e terminologianan di color menos comun.^[4] Mayoria di idioma indo-europeo, e terminologia 'ros' ta deriva di e flor yama rosa (genero: Rosa). E palabra Latin roseus tabata originalmente indica un color cora cla y briyo. Durante e evolucion di lenga romantico moderno, roseus a desaroya pa e balabra Frances rose, cual ta nifica 'un color cora masha bleek'.^[3] Ademas, na edad media, rose (ros) a ser destingui for di e color rouge (cora).^[5] E idioma Hapones tabata tin un palabra pa e color ros (momo), alrededor di 750 d.C. esaki ta pa e motibo cu tabata existi varios palabra competido pa e color cora.^[3]

Ros, den mayoria di idioma indo-europeo ta conoci como rose of rosa, na honor di e flor rosa.

Saliña ros pa su concentracion halto di salo na Rincon, Boneiro.

Chogogo ta ros pa motibo di su dieet (Gotomeer na Boneiro).

Historia[editá | editá fuente]

Ros ta asocia, en general, cu tur cos femenino, manera bailarina of Barbie. Sinembargo, e simbolo y significancia di ros a varia masha den transcurso di historia mundial. Awendia, e stereotipo cu ros ta pa mucha muhe y blauw ta pa mucha homber ta presente tur caminda, dicho concepto aki a gara forsa meymey di siglo binti. Asina mes, ros ta carga varios nificacion di calidadnan femenino, for di tutu y incocente te cu erotico y provocativo. Contrastando, bandanan di punk (manera Sex Pistols) ta pone enfoke riba aspectonan rebelde di e color ros.^[3]

Homero, den siglo 8 a.C., a referi na e concepto di color ros como e color na subida di solo (den Griego antiguo: ῥοδοδάκτυλος Ἠώς), den su obra, Odisea.^[6][1]

Paul Henri Thiry (1723–1789). Ros tabata ser bisti independientemente di genero.

Jeanne-Antoinette Poisson, Marquise de Pompadour pa François Boucher, conoci como 'Madame de Pompadour na su Tualet'. Madame de Pompadour a haci blauw y ros e color mas popular den Corte di Versailles.

Young Boy with Whip ('Mucha Homber cu Zweep', alrededor di aña 1840). Ambos mucha muhe y mucha homber tabata bista ros den siglo diesnuebe.

Ros a bin na moda pa prome biaha den occidente, medio siglo diesocho, ora e sociedad aristocratico, tanto hende homber como hende muhe, tabata bista variacionnan di ros cla como, por ehempel, señal di rikesa y poder, en bes di genero. Madame de Pompadour (1721–1764), e amante principal di Louis XV di Francia, tabata asina encanta cu e color ros cu, na aña 1757, fabricante Frances di porcelana Sèvres a nombra e tint nobo di ros na dje, yama Rose Pampadour.

Ros no tabata considera como un color di 'mucha muhe', babynan di ambos sexo tabata bisti blanco. E hecho ta cu e tint tabata considera como mas apropia pa mucha homber paso e tabata ser mira como un tono di color cora mas cla, cual ta referi na un bista masculino militarisa.^[7] Ros tabata asocia cu vigor y tabata bisti libermente pa hombernan elegante. Tiña ros tabata ser importa for di Sur Asia y Sur America. India ta famoso pa un rango incomporabel di tiña cora y ros. Na Sur Asia, ros a keda un color unisex. Na e prome mita di siglo binti, ros a bira asocia cu femenino. Presente, diseñadornan di moda manera e Britanico Americano, Harris Reed, ta adopta tur tono di ros pa subverti di e normanan di genero di siglo binti y conecta cu e extravagancia y libertad di moda anterior historico.^[8]

Den Alemania, na añanan 1930 y 1940, prizonero di campo di concentracion di Nazi cu a ser acusa di homosexualidad tabata obliga pa bisti un triangulo ros.^[9] Asina, e triangulo ros a bira un simbolo di movecion moderno di derechonan di homosexualnan.^[10]

Elvis Presley su Cadillac ros exhibi den museum di auto na Graceland.

Elvis Presley su Jeep ros exhibi na Graceland.

Elvis Presley a popularisa e estilo di bisti camisa ros cu kraag preto, traha na medida. Ademas, na añanan 60 y 70, Presley, tabata bista vestuario ros ariba escenario. Na aña 1955, Presely a adkiri un Cadillac pinta den color ros yama Elvis Rose.^[3]

Mira tambe e kategoria Pink di Wikimedia Commons pa mas dato mediatiko tokante di e tema aki.